Mini pizza resepti
Kiçik pizzalar – çox dadlı və hazırlanması asandır. Bu pizzaları özünüzlə piknikə, gəzməyə də götürə bilərsiniz.
Lazım olan ərzaqlar:
Xəmir üçün:
- 1 çay qaşığı şəkər
- 450 qr un (təxminən 2 stəkandan bir az çox)
- 250 ml su (1 stəkan)
- 1 xörək qaşığı zeytun yağı
- 1,5 çay qaşığı duz
- 1 çay qaşığı maya
Üzəri üçün:
- bibər
- zeytun
- sosis
- pomidor
- Holland pendiri
(İstəyinizə uyğun digər ərzaqlardan da istifadə edə bilərsiniz.)
Sousu üçün:
- İtalyan ədviyyatları,quru reyhan
- 2 x.q. ketçup
- 2 x.q. mayonez
Əvvəlcə xəmiri yoğururuq. Bunun üçün ilıq suya mayanı, şəkəri, duz və 1 stəkan unu əlavə edib qarışdırın və 15 dəqiqə isti yerdə saxlayın. Maya gəldikdə, hazırladığınız məhlulda köpüklər əmələ gəldikdə qalan unu az-az əlavə edib qarışdırın. Elastik, ələ yapışmayan xəmir əmələ gələnə kimi yoğurun və 45 dəqiqə isti yerdə saxlayın.
Xəmir gələndən sonra kiçik kündələrə ayırın, 10-15 sm diametrlik, qalınlığı təxminən 0.5 sm olan xəmirlər açın. Sobanın tavasını yağlayın, xəmirləri düzün. Üzərinə nazik qat sous ( mayonez, ketçup və ədviyyatı qarışdırın) çəkin, üzərindən bir az sürtgəcdən keçirilmiş holland pendiri səpin və doğradığınız ərzaqları yığın.
230 dərəcə qızdırılmış sobanın alt gözündə 20-30 dəqiqə altı qızarana qədər bişirin.
Üzərinə sürtgəcdən keçirilmiş holland pendiri töküb yenidən sobaya qoyun.
Pendir əriyib qızardıqda kiçik pizzalarımız hazırdı.